كــــــلامـ عــادى

ياريت نقعد ونتكلم على الهادى

بدون تزييفْ

كلام عادى ..

بسيط جدا

مفيش تكليفْ

كلام كان ابويا قالهولى

وقاللى اقوله لولادى

ياريت نقعد ونتكلم على الهادى

حصيره فْ أرض تجمعنا ..

وطبليَّه..

وحبِّةْ ملح . ونسمِّى

ونقسم ويَّا بعض رغيفْ

ونحمد ربنا ونشكر

يبارك لينا فى اللقمه وصحتنا

ويبعد عننا أمراض

تموتنا

إذا كلنا السيمون والبيفْ

كلام كان ابويا قالهولى

زمان كنا بنقعد تحت شجرايهْ

ونتمدد فى ضلايهْ

ونتسامر .. ونتساهر ..

ومن حدوته لحكايهْ

لا سَخنَّا الهوا مرهْ

ولا بَرَدْنَا

دى نسمه من هوا بلادنا

دى أجدع من مِتين تكييفْ

تعالوا نقول ونتكلم على الهادى

كلام كان ابويا قالهولى

وقاللى أقوله لولادى

انا مش ضد مدنيَّه وتكنولوجى

ولا ضد إننا نسمى علوم النفس سيكولوجى

ولا حتى انِّنا ندَّلع زكيه نقولَّلها كوكى

ولا نرطن فرنساوى وأمرُوكى

لكِين ضد إنى أتكلم كما الخواجاتْ

وأغزل من لسانى لغاتْ

وانا أصلا فى لغتى ضعيفْ

كلام عادى

بسيط جدا

مفيش تكليفْ

زمان كان الكبير له هيبه فى الحارهْ

وكنا بنحترم جارنا ..

وبندافع عن الجارهْ

وكانت بنت حتتنا

أمانه تلِف رقبتنا

ولو فاتت على بيتنا

عنينا تغوص فى سابع أرضْ

شهامه ونخوه وبنعرف نصون العرضْ

وحتى الحب ..

حتى الحب كان صافى

برىء .. طيب .. رقيق .. دافى

وكلمة حب كاتْ صعبهْ

لاهى نزوهْ .. ولا لعبهْ

ومش سهل انِّنا نقولها

ولا كان سهل نسمعها

لإن الحب كان مبدأ

وكان صادق وغرضه شريفْ

ماكانش كلام جميل معسولْ

وشرحه يطولْ

وجوَّا القلب كدب وزيفْ

ولسه أبويا صوته فْ قلبى بينادى

بيتكلم كلام عادى

كلام كان قاله أجداده .. وأجدادى

وقالهولى عشان احكيه لأولادى

يقول والدى :

زمانَّا برضه كان ماشى بقانون غابهْ

وكنا كلنا غلابهْ

بنشبع جوعْ

وبنصبَّر عطشنا دموعْ

ونغزل والكبير يلبس تِياب التِّيهْ

ونزرع روم ويسْكَر بيهْ

وحتى النخل ..

كان يُصْلُب ضلوعنا عليهْ

لكين عمره ما طوِّل يوم فى وسطينا

تِعِبْ هوَّ..

ولا تعبنا .. ولا وْطينا

ده إحنا الى أكلنا الطمى ويا الخضره والطينهْ

زمان كنا بنتوحد فى وقت الجدْ

ولو قمنا ماكان يقدر يصدنا حدْ

تشوفنا تقول مافينا ضعيفْ

فى وقت الحرب نمسك سيفْ

ووقت الكرب دم خفيفْ

ويوم الجدب ..

بنسمى ..

ونقسم ويا بعض رغيفْ

وحتى الحب ..

حتى الحب كان صافى

برىء .. طيب .. رقيق .. دافى

وكلمة حب كاتْ صعبهْ

لاهى نزوهْ .. ولا لعبهْ

ومش سهل انِّنا نقولها

ولا كان سهل نسمعها

لإن الحب كان مبدأ

وكان صادق وغرضه شريفْ

ماكانش كلام جميل معسولْ

وشرحه يطولْ

وجوَّا القلب كدب وزيفْ

ولسه أبويا صوته فْ قلبى بينادى

واله موضوع رائع جدا
تسلم ياميدو

ثانكس ياجنه ع المرور
نورتى التوبيك

زمان كان الكبير له هيبه فى الحارهْ

وكنا بنحترم جارنا ..

زمااااان
الزمن اتغير جااامد
كل حاجه حلوه كانت زمان
زمان كانت الناس بسيطه جدااا
مش عارفه ايه اللى بيحصل ده
مش عارفه
كلااااااااااااااااااااام جميييييل اوى يا ميدووو
متحرمناش جديدك يا جميل